ផ្សាររាត្រីកុងតឺន័រ «2040 Container Market» នឹងបើកដំណើរការ ២៤ ម៉ោងនាពេលខាងមុខ
ទីក្រុងភ្នំពេញទំនងជាមានកន្លែងកម្សាន្តកាន់តែច្រើនខណៈជនជាតិ សិង្ហបុរី បាននិងកំពុងរៀបចំផ្សារកុងតឺន័រថ្មីមួយទៀត ដែលនឹងបើកដំណើរការ ២៤ ម៉ោង នាពេលឆាប់ៗខាងមុខនេះ។
ប្រធានផ្នែកទីផ្សារនៃក្រុមហ៊ុន 2040 Container Market កញ្ញា អ៊ុំ ច័ន្ទវត្តី បានថ្លែងឲ្យដឹងតាមទូរស័ព្ទក្នុងសប្តាហ៍នេះថា ផ្សាររាត្រីកុងតឺន័រនេះ គ្រោងនឹងបើកដំណើរការនៅខែវិច្ឆិកាខាងមុខនេះ បន្ទាប់ពីមានការជួលតូបបានជាង ៨០ ភាគរយហើយរហូតមកទល់ពេលនេះ។
ផ្សាររាត្រីដែលស្ថិតនៅលើផ្ទៃដីទំហំជិត ២ ហិកតានេះ នឹងបើកដំណើរការ ២៤ ម៉ោង ដោយបែងចែកតំបន់អាជីវកម្មខុសៗគ្នាចំនួន ៤ ដូចជា កន្លែងលក់ទំនិញទូទៅ ហាងកាហ្វេ ហាងម៉ាស្សា រោងភាពយន្ត អាហារ និងភេសជ្ជៈ និង Pub Zone។
កញ្ញាបន្តថា ៖ «អ្វីដែលយើងផ្តោតសំខាន់ គឺ “Life Style” របស់ប្រជាជន ហើយអតិថិជនគោលដៅរបស់យើង គឺសម្រាប់មនុស្សគ្រប់រូប ដោយសារផ្សារនេះមានទំហំធំ និងបើកដំណើរការ២៤ម៉ោង»។
កញ្ញាបន្តថា ៖ «យើងយល់ពីបរិបទ និងចំណង់ចំណូលចិត្តរបស់ប្រជាជននៅទីនេះ ហើយយើងវិនិយោគដើម្បីឆ្លើយតបនឹងតម្រូវការរបស់ពួកគេ»។
ទោះជាយ៉ាងណាកញ្ញាមិនបញ្ជាក់ឲ្យដឹងពីទំហំវិនិយោគ ក្នុងគម្រោងនេះនោះទេ គ្រាន់តែបញ្ជាក់ថា ផ្សារនេះមានស្តង់សរុបចំនួន ៥០០ ដែលអាចចតរថយន្តបាន៣០០គ្រឿង និងម៉ូតូជាច្រើនរយគ្រឿងផងដែរ។
កញ្ញា អ៊ុំ ច័ន្ទវត្តី បានបន្តថា ៖ «យើងរំពឹងជោគជ័យ ដោយសារការឌីហ្សាញរបស់យើងមានលក្ខណៈពិសេស និងបែងចែកតំបន់លក់ទំនិញខុសៗគ្នា និងជាផ្សារកុងតឺន័រធំជាងគេ។ ហេដ្ឋារចនាសម្ព័ន្ធនានាដូចជាបន្ទប់ទឹក ផ្លូវ នឹងត្រូវរៀបចំដោយប្រុងប្រយ័ត្ន និងរំពឹងពីមនុស្សមកកាន់ផ្សារនេះច្រើន»។
បន្ទាប់ពីដំណើរការផ្សាររាត្រីកុងតឺន័រ ឬ Jet Container Night Market លើកដំបូងទទួលបានជោគជ័យ និងមានអ្នកវិនិយោគដទៃទៀតធ្វើការវិនិយោគ ស្រដៀងនឹងគម្រោងរបស់លោក លោកឧកញ៉ា ស្រី ចាន់ថន កាលពីពេលថ្មីៗនេះបានសរសេរលើគេហទំព័របណ្តាញទំនាក់ទំនងសង្គមរបស់ខ្លួនថា ក្រុមហ៊ុន Jet Group មានផ្សារកុងតឺន័រតែមួយប៉ុណ្ណោះ គឺ Jet Container Night Market ហេតុនេះការបើកផ្សារដទៃទៀត មិនពាក់ព័ន្ធនឹងក្រុមហ៊ុនរបស់លោកឡើយ ទោះជាបរាជ័យ ឬជោគជ័យក្តី។
ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍនៃក្រុមហ៊ុន Emerging Consulting Market លោក ង៉ែត ជូ បានប្រាប់ថា និន្នាការធ្វើអាជីវកម្មនៅកម្ពុជាភាគច្រើនធ្វើឡើងតាមគ្នា ដែលមានហានិភ័យ និងខាតបង់ផលប្រយោជន៍ដល់សេដ្ឋកិច្ច ព្រោះនៅកម្ពុជារដ្ឋាភិបាលមិនមានស្ថាប័នណាមួយសិក្សា ឬបណ្តុះគំនិត និងស្រាវជ្រាវពីអាជីវកម្មថ្មីៗសម្រាប់ អ្នកវិនិយោគឡើយ។
លោកបន្តថា៖ «ការធ្វើអាជីវកម្មតាមគ្នាប្រឈមហានិភ័យច្រើន ហេតុនេះរដ្ឋាភិបាលគួរបង្កើតវិទ្យាស្ថាន ឬ ស្ថាប័នសិក្សាស្រាវជ្រាវ ដើម្បីរកគំនិតច្នៃប្រឌិតថ្មីៗ ដែលអាចផ្តល់ចំណេះដឹងដល់អ្នកវិនិយោគនានា»។
លោក គុយ វ៉ាត អគ្គនាយកក្រុមហ៊ុន VTRUST GROUP ធ្លាប់បានថ្លែងឲ្យដឹងផងដែរថា អាជីវកម្មតាមគ្នាពិតជាមានបញ្ហាច្រើន សម្រាប់អ្នកធ្វើតាមគេ និងគ្មានជំនាញច្បាស់លាស់។
លោកបន្តថា ប្រសិនជាគ្មានជំនាញច្បាស់លាស់ និងគ្មានបទពិសោធ អាជីវកម្មពួកគេប្រឈមមុខនឹងការដួលរលំ។
លោកបន្តថា ៖ «ជាក់ស្តែងនៅតំបន់ព្រែកលៀប តើមានភោជនីយដ្ឋានប៉ុន្មានរយកន្លែង ដែលបានបើកដំណើរការ នៅពេលដែលស្ពានជ្រោយចង្វារបានបញ្ចប់ការសាងសង់ ប៉ុន្តែរហូតមកទល់ពេលនេះ តើមានភោជនីយដ្ឋានប៉ុន្មាន ដែលអាចនៅដំណើរការដល់សព្វថ្ងៃ»៕
Post a Comment