អាថ៌កំបាំង​ពី​ក្រោយ​ពាន បវរកញ្ញា​កម្ពុជា​ទទួល​​​ពី​ក្រោយ​ឆាកទាំងទឹកភ្នែក គ្រប់​គ្នា​កំពុង​ឆ្ងល់

ពេល​បវរកញ្ញា​កម្ពុជា​​ទទួល​បាន​ពាន​ប្រជាប្រិយភាព​លើ​បណ្តាញ​សង្គម (Miss Pageant’s Choice Award) ក្រោយ​ធ្លាក់​នៅ​ត្រឹម​វគ្គ ២០ នាក់​ចុង​ក្រោយ​ទៅ​ដណ្តើម​ម្កុដតម្លៃ ៣០ ម៉ឺន​ដុល្លារ អ្នក​គាំទ្រ​កម្ពុជា​ជា​ច្រើន​នាំ​គ្នា​ឆ្ងល់​និង​ខ្លះ​ខឹង​សម្បារ​កម្មវិធី Miss Grand International ថា​ហេតុ​អ្វី​មិន​រៀប​ចំ​ឆាក​ឲ្យ​ស្រួល​បួល​ដល់​បវរកញ្ញា​កម្ពុជា​ទទួល​ពាន​នោះ។

តាម​ពិតពាន Miss Pageant’s Choice Award គឺ​ជា​ពានក្រៅ​ផ្លូវការ​មិន​ស្ថិត​ក្រោម​ Miss Grand International នោះ​ទេ ពោល​គឺ​ថា​វា​ជា​ពាន​ដែល​កើត​ឡើងពី​​ការ​រៀប​ចំ​របស់​ផេក​អ្នក​គាំទ្រ (Facebook Fanpage) ឈ្មោះ Miss Grand Pageant Insider។ ប៉ុន្តែ​ពាន Miss Pageant’s Choice Award ដែល​រៀប​ចំ​ដោយ Grand Pageant Insider គឺ​ត្រូវ​បាន​អនុញ្ញាតិ​និង​ទទួលស្គាល់​​ដោយប្រធានកម្មវិធី​ប្រឡងបវរកញ្ញា​ Miss Grand International and Thailand ជនជាតិ​ថៃ​លោក Nawat Itsaragrisil (ณวัฒน์ อิสรไกรศีล)។

ពាន​នេះ​ក៏​ជា​មោទនភាព​មួយ​សម្រាប់ បវរកញ្ញា​ Miss Grand International គ្រប់រូបរួម​ទាំង​បវរកញ្ញា​កម្ពុជា កញ្ញា ខ្លឹម ស្រីគា ដែល​ទទួល​ការ​បោះឆ្នោត​តាម​បណ្តាញ​សង្គម​ច្រើន​យ៉ាង​គំហុក​លើស​បេក្ខនារី​ប្រទេស​ដទៃ​ដាច់​តែ​ម្តង ដោយ​បាន​ចំនួន 31,623 Likes និង 73,431 Shares x 5 = 367,155 + 31,623 ​សរុប​ 398,778 points (ពិន្ទុ)។

កាល​ពី​ឆ្នាំ​កន្លង​ទៅ​ក៏​មាន​បេក្ខនារី​បវរកញ្ញា Miss Grand International តាម​ប្រទេស​ផ្សេងៗ​ដូចថៃ​ជា​ដើម ក៏​ធ្លាប់​ទទួល​បាន​ពាន​រង្វាន់​ដូច​ស្រីគា នេះ​ដែរ ដោយ​ពិន្ទុ​ពឹងផ្អែក​លើ​ការ​បោះឆ្នោត​ពី​អ្នកគាំទ្រ​លើ​បណ្តាញ​សង្គម៕