ទូកង «ខ្មែរកម្ពុជាក្រោមមានជ័យ» ចូលរួមប្រកួតឆ្នាំនេះ អំពាវនាវរកអ្នកឧបត្ថម្ភ

គណៈកម្មការទ្រទ្រង់ទូក ង «ខ្មែរកម្ពុជាក្រោមមានជ័យ» នៃមិត្តសមាគមខ្មែរកម្ពុជាក្រោម មានមូលដ្ឋាន នៅប្រទេសកម្ពុយជា នៅព្រឹកថ្ងៃទី ៣០ តុលា ២០១៧ នេះ បានរៀបចំពិធី ក្រុងពាលីសែនព្រេនដល់ម្ចាស់ទឹក ម្ចាស់ដី សុំសេចក្តីសុខ សេចក្តីចំរើន ទៅតាមទំនៀមទម្លាប់របស់ខ្មែរ តាំងពីបុរាណមក ដើម្បីរំកិលទូក ង ចុះទឹក ត្រៀមចូលរួមអបអរព្រះរាជពិធីបុណ្យអុំទូក អកអំបុក សំពះព្រះខែ ប្រពៃណីជាតិ ដែល នឹងប្រព្រឹត្តទៅ ចាប់ពីថ្ងៃទី ២ ដល់ថ្ងៃទី ៤ ខែវិច្ឆិកា ២០១៧ ខាងមុខនេះ ។

ពិធីនេះ មានការចូលរួមជាអធិបតី ពីព្រះចៅអធិការវត្តភ្នំពេញថ្មី ព្រះនាម ប៉ាង សុដា ព្រះចៅអធិការ វត្តសាមគ្គីរង្សី ហៅវត្តខ្មែរក្រោម ព្រមទាំងព្រះសង្ឃក្នុងវត្ត គណៈកម្មការអាចារ្យ តំណាងអង្គការ សមាគមខ្មែរកម្ពុជាក្រោម គណៈកម្មការគ្រប់គ្រងទូក ង «ខ្មែរកម្ពុជាក្រោមមានជ័យ» និងក្រុមកីឡាករអុំទូកជាច្រើននាក់ ។

ប្រធានគណៈកម្មការទ្រទ្រង់ទូក ង «ខ្មែរកម្ពុជាក្រោមមានជ័យ» លោក ថាច់ ឡែន បានឲ្យដឹងថា ទូក ង ដែលកំពុងរៀបចំពិធីក្រុងពាលី រំកិលចុះទឹកនាពេលនេះ មានចំណុះកីឡាករ ២៣ នាក់ ។ លោកឲ្យដឹងបន្ថែមថា ទូក ង «ខ្មែរកម្ពុជាក្រោមមានជ័យ» ធ្លាប់បានចូលរួមប្រកួត ប្រជែងក្នុងពិធីបុណ្យជាតិជាច្រើនលើករួចមកហើយ និងទទួលបានជ័យលាភីគួរជាទីមោទនៈ នាពេលអុំប្រណាំង កាលពីប៉ុន្មានឆ្នាំកន្លងមកនេះផង ។

លោក ថាច់ ឡែន បានបញ្ជាក់ដែរថា ទូក ង «ខ្មែរកម្ពុជាក្រោមមានជ័យ» ដែលជាទូកតំណាងឲ្យខ្មែរក្រោមទាំងនៅក្នុងស្រុក និងក្រៅស្រុកតែមួយគត់ ដែលចូលរួមអុំប្រណាំងនៅឆ្នាំនេះ គឺជាទូក ដែលទើបតែជាវមកថ្មី ដោយចំណាយអស់ទឹកប្រាក់ចំនួន ៤, ៥០០ ដុល្លារ៍សហរដ្ឋអាមេរិក ។

នៅក្នុងការចូលរួមអុំប្រណាំងនេះ លោក ថាច់ ឡែន ប្រធានគណៈកម្មការទ្រទ្រង់ទូក ង «ខ្មែរកម្ពុជាក្រោមមានជ័យ» បានធ្វើការអំពាវនាវ ចំពោះសប្បុរសជនជិតឆ្ងាយ ឲ្យចូលរួមឧបត្ថម្ភទូក ង «ខ្មែរកម្ពុជាក្រោមមានជ័យ» ទៅតាមលទ្ធភាព ទាំងថវិកា និងសម្ភារៈផ្សេងៗ ដើម្បីឧបត្ថម្ភដល់ក្រុមកីឡាករទូក ង និងដើម្បីលើកស្ទួលដល់សកម្មភាពវប្បធម៌ប្រពៃណីដ៏ឧត្តុង្គឧត្តមនេះ៕