ក្តៅៗ៖ សោកនាដកម្ម មួយទៀតហើយ!!! បុកបន្តកន្ទុយគ្នា រវាងរថយន្ត​បាឡែន រថយន្តវីអាយភី កាពីតូល​ និងឡានដឹកដី (មានវីដេអូ​)

ខេត្តបាត់ដំបង៖ សោកនាដកម្មមួយទៀតហើយ បានកើតឡើងនៅឃុំព្រៃតូច ស្រុកមោងឬស្សី ខេត្តបាត់ដំបង កាលពីវេលាម៉ោង ជាង១០ព្រឹក ថ្ងៃ១១ មេសា ២០១៧នេះ មានគ្រោះថ្នាក់ចរាចរ រវាងរថយន្តបាឡែន បុកបន្តកន្ទុយគ្នា ជាមួយរថយន្ត វីអាយភី កាពីតូល និងឡានដឹកដី តែខណៈនេះ នៅមិនទាន់ដឹងជាក់លាក់ ពីចំនួនអ្នកស្លាប់ និងអ្នករបួសនៅឡើយទេ ។

បើតាមប្រភពពីសារព័ត៌មាន Fresh News បានឲ្យដឹងថា៖ មានមនុស្សចំនួន១១នាក់ បានរងរបួសធ្ងន់ស្រាល ដោយសារតែរថយន្តចំនួន៣គ្រឿង បានបុកបន្តកន្ទុយគ្នា ស្ថិតនៅតាមផ្លូវជាតិលេខ៥ ភូមិព្រៃតូច ឃុំព្រៃតូច ស្រុកមោងឬស្សីកែវ ខេត្តបាត់ដំបង។ ហើយក្នុងចំណោម ជនរងគ្រោះ១១នាក់ មានស្រី៥នាក់បានរងរបួស ក្នុងនោះរងរបួសធ្ងន់៤នាក់ ក្នុងនោះស្រីម្នាក់ផងដែរ។ បើតាមមន្រ្តីនគរបាល បានប្រាប់ថា គ្រោះថ្នាក់ចរាចរណ៍ខាងលើ បានកើងឡើង ដោយនៅមុនពេលកើតហេតុ មានរថយន្តមួយគ្រឿង ប្រភេទ VIP របស់ក្រុមហ៊ុនកាប់ពីតូល ធ្វើដំណើរទិសដៅ ពីបាត់ដំបងមកភ្នំពេញ ស្រាប់តែដល់ចំណុចកើតហេតុ បានជ្រុលទៅបុក ឡានដឹកដីមួយគ្រឿងនៅពីមុខ។



ពេលនោះក៏មាន រថយន្តមួយគ្រឿងម៉ាក Camry បាឡែន បានធ្វើដំណើរមកពីក្រោយ ក៏បានបុកបន្តទៀត បណ្តាលឲ្យមនុស្សចំនួន១១នាក់ នៅក្នុងរថយន្តប្រភេទ VIP និងរថយន្ត Camry បាឡែនរងរបួសធ្ងន់ស្រាល។ នៅក្នុងគ្រោះថ្នាក់ចរាចរណ៍ខាងលើនេះ ក៏បណ្តាលឲ្យអ្នកជិះកង់ម្នាក់ រងរបួសធ្ងន់ផងដែរ។


បន្ទា​ប់ពីមានគ្រោះថ្នាក់ ចរាចរណ៍ខាងលើនេះ កម្លាំងសមត្ថកិច្ចមូលដ្ឋាន បានទៅជួយអន្តរាគមន៍ និងហៅរថយន្តពេទ្យដឹកជនរងគ្រោះ ទៅសង្គ្រោះបន្ទាន់។

សូមបងប្អូនប្រជាពលរដ្ឋ មេត្តាបង្កើនការប្រុងប្រយ័ត្ន អោយបានខ្លាំងជាអតិបរមា ព្រោះគ្រោះថ្នាក់កើតឡើង គ្រប់ជំហាន។ ពេលខ្លះគេបុកយើង ពេលខ្លះយើងបុកគេ ដោយសារការធ្វេសប្រហែស តែមួយពព្រិចភ្នែកប៉ុណ្ណោះ។ ហើយក៏សូមជូនពរដល់បងប្អូនប្រជាពលរដ្ឋទាំងអស់ ធ្វើដំណើរដោយសុវត្ថិភាព ក្នុងឱកាសចូលឆ្នាំថ្មី ប្រពៃណីជាតិយើងនេះ ៕